SERCHHIP DC HOVIN NLUP 2nd PHASE TANPUINA SEM DAN TUR RUAHMAN


Serchhip, the 5th August, 2013: August ni 7, 2013 (Nilaini) a NLUP 2nd Phase sem runpui Serchhip District chhunga neih dan tur relin; vawiin chawhma dar 10:00 khan Serchhip DC Meeting Room-ah Serchhip District Bawrhsap Pi Juhi Mukherjee, IAS kaihhruaiin District-Level NLUP Implementing Committee, District-Level NLUP Monitoring Committee, NLUP Line Department aiawhte leh thuthar lakhawmtute an thukhawm.

Ruahman dan chuan NLUP 2nd Phase semna inkhawm hi August ni 7, 2013 (Nilaini) chawhma dar 11:00 ah Serchhip DC Conference Hall-ah tan a ni ang a, khuallian atan Pu Lal Thanzara, Parliamentary Secretary leh Khual Zahawm atan Pu C.Lalruata, MIFCO Chairman te chu Sawrkar ruatsa an ni a, hemi ni hian programme urhsun taka ruahman niin inkhawm kaihruai turin Pu Lalsangliana Addl. DC., Serchhip ruat a ni a, Bawrhsapin inlawmna thu a sawi ang a, NLUP Beneficiary hlawhtlingte aiawh; an hlawhtlinna leh hlawhtlin dan sawitur ruat anih bakah, Village Council aiawh mi pakhat an khua in NLUP an hlawkpui dan sawi tur ruat a ni a, Line Department tinin NLUP Beneficiary an thlanchhuah panga theuh hnenah cheque hmangin NLUP tanpuina sum hi Khuallianin a hlan ang a, midang zawng chu he inkhawm zawh anih hnu hian sem an ni ang.

NLUP sem runpui neihna hmunah hian Line Department zawng zawng ten NLUP an hlawhtlinpuina thlalak mipui hmuh theih tura tarchhuah (Photo Exhibition) a ni ang a, hei bakah hian Line Department tina Beneficiary titha thlanchhuahte chu Local Cable TV a tihchhuah turin August ni 6, 2013 (Thawhlehni) tlai hian Biangbiakna (Interview) neihpui an ni ang. NLUP semna inkhawm ah hian ei leh in tuihnai tak buatsaih ani bawk dawn a ni.

Serchhip District chhunga he programme hmanna tura ruahman hmun dang; North Vanlaiphai leh Thenzawl te chu aiawhtu SDO(C) te hnenah Serchhipa hman tur Programme zulzuiin uluk taka ruahmanna lo siam turin Bawrhsap chuan a chah nghal bawk a ni.

Source: DIPR, Serchhip