ANTI DENGUE MONTH SERCHHIP AH HMAN A NI


Dated Serchhip, the 5th July, 2016: Vawiin chawhma dar 11:00 khan CMO Conference Hall Serchhip ah Anti Dengue Month hman a ni a, Serchhip khaw chhunga MHIP Branch hrang hrang atangin member thahnem takin he hun hi an hmang.

He hun hi Dr. Laldawngliana Sailo, CMO Serchhip chuan a kaihruaia, Dengue natna hi Malaria ang tho a thosi atanga inkaichhawn theih natna a nih thu sawiin, Mizoramah erawh chuan kan la hriat tam loh tak natna anih avang hian he natna chungchang hi kan hriat chian a tul thu a sawi a. Dr. Lallawmzuala, MD, JN Hospital Serchhip leh Dr. Zoramthara, Public Health Consultant te chuan kalkhawmte hnenah Dengue natna chungchang, a inkaichhawn theih dan leh a enkawl dante Power Point hmangin an zirtir a ni.

Dengue natna hi Aedes Aegypti thosi, Dengue natna hrik paiin mi a seh atanga kai theih a ni a, tlang hrileng angin fur laiin thawk leh khatah a puang chiam thei a, enkawl vat loh chuan thihpui thuai theih a ni. Dengue natna hrik pai thosi te hi mihring chen tamna hmunah an awm duh bik a, bur ruak, bucket ruak leh pangpar khawina pot-ah te tuiin, an inthlah pung thin a, mihring thisen an duh bikin chhhun lamah mi a seh deuh ber thin niin mithiam te hian an sawi a ni.

He natna hi South-East Asia ah hian vei an tam thin a, kum tinin mi maktaduai 50 atanga maktaduai 100 velin vei ziah ang a ni. Mizoramah chuan kum 2012 atang khan he natna hi hmuhchhuah niin kum 2016 May thla thleng hian Dengue vei mi 76 hmuh chhuah tawh niin thihpui erawh an la awm lo thung.

Mithiam ten zirtirna an pek zawh hian zawhna leh chhanna hun hman a ni a, Pi K. Lalmalsawmi, VBDC chuan lawmthu sawina hun a hmang bawk.

Source: DIPR, Serchhip