INDIA RAMA CIVIL MI TE CHAWIMAWINA SANG “PADMA AWARDS” DAWNG TUR A THEHLUH THEIH


Serchhip, 5th June, 2014: India ram sawrkarin Republic Day apianga a sem thin vantlang rawngbawlna lama hnathawk tha leh thawhhlawk chungchuangte Chawimawina sang chi hrang hrang Padma Vibushan, Padma Bushan leh Padma Shree te chu a phu leh tling ten an dawn zel theih nan recommendation siam theih a ni a. Recommend duh neih chuan a Form siamsa DIPRO Office-ah la in August 2014 thla ral hma ngeiin Under Secretary to the Government of Mizoram, Department of Home hnenah thehluh theih a ni.

Heng chawimawina sang dawng thei tur hian Art lama hlawhtling chungchuangte, Thu leh Hla lama thawhhlawk zualte, Infiamna leh damdawi lam zirna lama hnuhma nei tha chungchuangte, Vantlang rawngbawlna leh Science thiamna lama hratkhawkheng zualte, sumdawnna leh thil siam chhuah kawnga hnarkaitute recommend theih an ni a, lawmman dawngtura an that bikna / lawmman an phu bikna te thumal 800 aia tam lo hmangin ziah lan bawk tur a ni.

He lawmman hi dan naranin minung hnenah chauh pek thin a ni a, thi tawhte tan a kan recommend dawn a nih chuan a phu zual tak meuh ni a kan hriat leh an thihna la rei lo tak te chauh an ni tur a ni. Hnam tenau leh hnuaihnung zawkte bakah pianphung a rualbanlohna nei te ngaihpawimawh theih nise a duhawm hle bawk.

Hetiang Civil mite chawimawina sang dawng tur hian sawrkar hnathawkte zingah chuan Doctor leh Scientist te chauh recommend theih an ni.

Source: DIPR, Serchhip