CHENG NUAI 27 CHUANG SENG A SAK YMA SUB-HEADQUARTERS, SERCHHIP OFFICE BUILDING CHIEF MINISTER IN HAWNG

“MIZORAM THAN ZELNA KAWNGA YMA TE NEN THAWHHONA THA TAK KAN NEIH HI SAWHNGHEH ZEL KA DUH” - CHIEF MINISTER


Serchhip, 5th March, 2015: Chief Minister Pu Lal Thanhawla chuan vawiin chawhma dar 11:00 khan Serchhip New Market sira YMA Sub-Headquarters, Serchhip Office building thar Rs. 27,20,945/- senga sak chu a hawng.

Office Building hawnna inkhawm buatsaih ah thu sawiin Chief Minister chuan YMA te chu kan khawtlang nun leh ram kalsiam khalh ngil kawngah hna ropui tak an lo thawk tawh a, Sawrkar nen in hne rem taka an thawh thinna chuan rah tha tak a chhuah mek a ni a ti a, Mizoram leh khawtlang nun than zelna kawnga thawhhona tha tak an neih chu tichak lehzual a sawhngheh zel a duh thu a sawi a ni.

Chief Minister chuan ei leh bar, sum leh paia intodelh hi hnam ropui leh zahawma kan insiamna tur pawimawh tak a ni a, hemi tur hian a kalkawng kan hria a, awmze nei takin kan kal a ni tiin arkhawthim dai mai mai an nih loh thu a sawi a, Mizoram sawrkarin mumal taka kal turin kumtin Rs. vaibelchhe 5000 – 6000 a mamawh laiin vaibelchhe 300 vel bak kan thawk chhuak theilo a, hei hi kumtin kan kal thin dan a nih avang leh Sawrkar Laipuiin engemaw zat tum ve tura min phut thin ziah avanga hun lo kal leh zel tur atana kawng sah kuak a ngaih tawh avangin leh kan tana tha tur zawk anih tawh avangin chhiah lamah ram tan tha kan thawh ve a ngai a ni a ti a, ramchhung state dang nen khaikhin chuan chhiah la tlem ber te zing ami an la nih zawk thu sawiin mipuite pawhin an hriatthiam a beisei thu a sawi a ni.

Chief Minister chuan mithiamten an zirchianna ah Mizoram mipui za a sawmsarih (70%) hikuthnathawk, lo neia eizawng kan ni a, an ni hi kan ram hnuk innghahna an nih avangin anmahni behchhan chung leh Lal Isuan, “Heng mite berte chunga in ti hi Ka chunga ti in ni” ti a alo sawi tawh hre reng chungin miretheiten leirem an rah a, anmahni khaw buzawlah ngei mihausa leh thiltitheite tlawn ngai lova eizawnna ngialnghet an neih theih nan NLUP changtlung zawk kalpui a ni a, hei hi Pathian lam tang programme anih avangin sawichhiatna karah pawh malsawmna in vur zel an ni zawk a ni a ti a, NLUP chu a tira ruahmanna an siam pawh sawrkar Laipuiin a aia tha zawka her rem sakin sum pawh an dil aia tam zawk a pek thu te, United Nations’ Programme hrang hrangte leh NLUP thiltum chi hrang hrang ramngaw siam, loneitute eizawnna nghet siamsak bakah sik leh sa humhalh etc. chu a in an avangin UN pawhin a rawn ngaihven a, UN Agency pali in hma lak tumin bul an rawn tan tawh a ni a ti bawk. NLUP kalpui anih tantirh a felfai taka hmalak anih theih nan YMA ten baseline survey an neihsak te chu lawmthu sawiin tunah hian a endik hna kalpui mek a ni tawh a, he tah pawh hian ram kalsiam her remna anih avangin uluk taka ngaihven leh endik pui thin turin a sawm nghal bawk a ni.

YMA Sub-Headquarters, Serchhip Office building hi Serchhip New Market bula PWD ram 185 sq.ft a zau sahthlak a sak a ni a, a sak nan hian Chief Minister leh Lok Sabha MP Pu CL Ruala te hmalakna in MPLADS fund atang Rs. 27,00,000 (tum khatna – Rs. 7,00,000/-, tum hnihna leh tum thumna – Rs. 10,00,000 ve ve ) pek an ni a, Sub-Heasquarters hnuaia YMA member te pawisa thawhkhawm Rs. 1,55,945 (member pakhat Rs. 5 zelin vawihnih khawn a ni) a vaiin Rs. 28,55,945/- hmuh a ni a, October ni 9, 2010 atanga sak tan niin a sak zawh nan hian Rs. 27,20,945/- senral a ni. Office building hi chhawng hnih a sang a ni a, basement 36 ft x 14 ft a zau siam tel a ni bawk a, Ground Floor leh First Floor hi 52 ft. x 28 ft. a zau ve ve an ni bawk. First Floor hi Office atana ruahman niin Meeting Room, Office Bearers’ Room/Office leh Computer Room a awm a, Ground Floor leh basement chu tangkai taka hman tura ruahmanna siam mek a ni bawk.

YMA Sub-Headquarters, Serchhip hi kum 2008 a din niin a hnuaiah hian Group 3 – Tawi Tlang Group, Vantawng Group, Tuichangral South Group bakah Branch 70 a awm mek a ni.

YMA Sub-Headquarters, Serchhip office building hawnna inkhawm hi Pu RL Chhuanawma, President, YMA Sub-Headquarters, Serchhip in a kaihruai a, Pu R. Sanghmingthanga, Secretary, YMA Sub-Headquarters, Serchhip in Building Report a pe a, Pu H. Lalrinawma, Asst. Secretary, YMA Sub-Headquarters, Serchhip in lawmthusawina hun hmangin hnu a khar a ni.

YMA Sub-Headquarters, Serchhip office building hawnna inkhawmah hian Central YMA hruaitute bakah Serchhipa tlawmngai pawl hrang hrang hruaitute leh khawtlang mipawimawhte an tel kim hle a ni.

Source: DIPR, Serchhip