SERCHHIP-AH MIZORAM CHHIM LAM DISTRICT PALI HUAP MOCK-DRILL HLAWHTLING TAKA NEIH A NI


Serchhip, 5th February 2014: Vawiin khan National Disaster Management Authority, Mizoram State Disaster Management Authority leh Serchhip District Disaster Management Authority te tang kawp huaihawtin Serchhip khawpui chhung hmun hrang hrang panga ah chhiatrupna a lo thlena chetlak dan lemchan (Mock Drill) neih a ni.

Mock Drill hi vawiin chawhma dar 10:00 a Shillong khawpui hnuai leichhung kilometer 15 a thuk ah 8.7 Ritcher Scale a na lirnghing in Serchhip khawpui a nghawng theih dan entirna leh chhanchhuah hna thawh dan entirna a ni a, DC Office, IOC Petrol Pump, Little Flower Convent, Serchhip Bazar leh JN Hospital, Serchhip ah te Mock Drill hi buatsaih a ni a; Sawrkar Department hrang hrang bakah, National Disaster Response Force, Guwahati, Little Flower Convent, Serchhip, leh Sub-Headquarters YMA, Serchhip ten chhiat thut awm palha chet lak dan tur an entir a ni.

Maj. Gen.(Retd.) V.K.Datta, Sr. Specialist, National Disaster Management Authority chuan Mock Drill neih zawh hian DC Conference Hall-ah observer leh official hrang hrangte Final briefing a nei a, an hmuh dan leh tih belh tulte an sawiho a ni a, District Bawrhsap Pi Juhi Mukherjee, IAS chuan Mizoram Sawrkarin Mock Drill neihna atana Serchhip an thlang chu lawmawm a tih thu sawiin an dinhmun dik tak te a hriat theih bakah, insiamthat ngaihna leh hmalak belhna tur tam tak a hmuhchhuah thu a sawi a, District Disaster Management Plan pawh her rem a ngaih nual dawn thu sawiin, Serchhip Bazarin chhiatrupna a lo thlen a insingsak dan tur “Evacuation Plan” mumal a neilo chu a rang lama enchian ngai a tih thu a sawi bawk. Bawrhsap chuan Disaster Management chungchang ngaihtuah hona leh Mock Drill ah te Department hotu te hmel a hmu tlem chu pawi a tih thu sawiin tam takin aiawh an tir chu thil tha lo tak ni a a hriat thu a sawi a, rang taka thutlukna siam ngai thilah an nauten thu an pawh chah mai ngam thin loh avangin chhiatna lo thlen tak tak hunah phei chuan a buaithlak dawn hle tih a sawi bawk. Bawrhsap hian chhanchhuahna hmanrua an mamawh zualte phuhruk thuai anih theih nan hma lak a tum thu a sawi bakah heng hmanraw pawimawh zual phei hi chu rikrum thila awlsam taka a mamawhtu ten an hman thuai theih nan khawchhung hmun pawimawh zualah te dah lawk vek tula a hriat thu a sawi bawk.

India ram hmun hrang hrang chhiatrupna a thlen a chhanchhuah hna thawktu pawl Guwahati atanga lo kal National Disaster Response Force (NDRF) te pawhin chhiatrupna thlen huna hmalak dan tur an hmanraw tha te hmangin an entir a, an Commander chuan Mizoram Police ten chhiatrupna lo thlen palh pawh a W/T Set hmanga inbiakpawh zung zungna tura ruahmanna an siam dan chu tha a tih thu leh Serchhip Superintendent of Police, Pu Romil Baaniya, IPS chu amah ngeiin hma hruai a Police te chetlak dan tur engkim a ruahman fel zung zung zel chu fakawm a tih thu leh entawntlak a tih thu a sawilang bawk a ni.

Maj. Gen.(Retd.) V.K.Datta, Senior Specialist, NDMA pawhin Incident Response System chart mila hma lak tan a pawimawh thu leh, officer leh mawhphurhna la tu mipawimawh zawng zawngte pawh an chanpual theuh hrilhfiah a uluk taka zirtirna pek tul atih thu a sawi a, Chhiatrupna thlen huna chhanchhuah hna thawktu pawl te leh an hruaitu, nihna hrang hrang neite pawh mipui ten awlsam taka an hriat a harsatna an siam sak loh nan anmahni nihna tarlang thei tur inthuamna emaw ruahmanna siam a tul thin thu te sawiin, insiamthat ngaihna lai ni a a hriat chi hrang hrang a sawilang a; a tlangpuia khaikhawmin Mock Drill chu hlawhtling thawkhat atih thu a sawi a, District dang atanga Observer lo kal te pawh an haw hunah an DC theuh te hnenah kimchang taka report pe a, hmalak tulna apiangah chak taka hma la turin a chah bawk a ni.

Vawiin Mock-Drill ah hian chhiatrupna a lo thlen huna chhiatna thlenna hmun te mipuiin tul lova an chim huk loh nan Police Line siamin hrui an zam a, Electric current kal sual tur te P & E lamin an check fel vek bakah current hruipui chat pawh temporary electric post siamin chhanchhuah hna thawktu te hman turin eng an pe a, Safety Officer in Inchim belh thei a awm em tiin an enfel vek hnuah chhanchhuaktu turte an lut a, chhiatna thlen avanga hliam leh mitthi te lakchhuah dan, dimdawi taka hliamte chawi/zawn dante, inchung atanga hliam tuarte khai thlak dan te leh Doctor ten hliam tuar te an endikna tur hmun ruahman dan te leh thildang zir tur pawimawh tam tak tarlan a ni.

Vawiin Mock Dril ah hian Little Flower Convent School naupangte leh zirtirtute, YMA Volunteers 40, NDRF Team 2,Mizoram Police 60 ,14 Assam Rifles sipai 40, On-Site Medical Team 4 (Doctor + Nurse + Driver in each Team), JN Hospital Doctor, Nurse leh thawktu dangte bakah Sawrkar official thahnem tak an tel a, NDRF Team te hmanrua chi hrang hrang leh motor bakah Truck 2, Bus 1, Firetenders 3, Ambulances 3, P.A. Systems 2, Car pahnih Ambulance anga hman chawp bakah JCB 2 hman a ni bawk.

District Bawrhsap Pi Juhi Mukherjee, IAS chuan Mock Drill hlawhtlinna tura theihtawp chhuah tu Little Flower Convent School Principal, Staff leh zirlai naupang te, Serchhip Bazar Welfare Association te, YMA te, Media te leh Sawrkar Department hrang hrangte chungah tha taka intawiawmna leh thawhhona an neih avangin lawmthu a sawi a ni.

Source: DIPR, Serchhip