FISHERIES MINISTER-IN SERCHHIP DISTRICT FISHERIES OFFICE TLAWH


Serchhip, 4th December, 2014: Fisheries Minister Dr. B.D. Chakma chuan vawiin khan District Fisheries Development Officer’s Office, Serchhip tlawhin DFDO Pi Zonuntluangi leh a staff te nen inkawmhona hun an hmang.

DFDO Office Staff te hma ah fuihna thu sawiin Minister chuan Serchhip District chu a ngaihpawimawh zia leh an laka beisei a neih san thu a sawi a, field worker an ni tih inhria a fish farmer te pawh an sangha dil kum khatah vawi hnih tal tlawh chhuah sak vek a, thurawn pek ngaite leh enzui sak ngaite vil reng turin a chah a, fish farmer te hlawhtlinna chu Department hlawhtlinna tehfung atan hman anih thin avangin inlaichinna tha tak siam pui turin a chah a ni.

Dr. B.D.Chakma chuan Fisheries Department kaltlang hian Community Fish Pond Project kalpui tuma hma a lak thu sawiin thalaite tan eizawnna tha tak anih theih dawn thu a sawi a, Sawrkarin Sangha Dil a laih bakah sangha chi leh chaw, mamawh dang a tum vek ang a a enkawl hna erawh thalai taima rual inthurual hnenah a nghat ang a, an nin Sangha te enkawlin an hralhchhuah hunah a hlawkna chu an insem thin dawn a ni. Hemi atan hian Sangha Dil siamna tur an mamawh dawn avangin Village Council nen indawr erawh angaih tur thu a sawi. Thenzawl Fish Farm pawh tuaithar leh turin ruahmanna tha tak siam anih tawh thu leh kumthar atanga mumal taka hma lak tan theih anih tur thu a sawi bawk.

Pi Zonuntluangi, DFDO pawhin thu sawiin a changtu Minister ngeiin an office a tlawh sak chu lawmawm a tih thu leh theihtawp chhuah a tan an lak ve reng thu a sawi a, an Office dinhmun tlangpui sawiin report a pe a ni.

Tun dinhmunah Serchhip DFDO Office hnuaiah hian fish farmer (sangha dil siam) chhungkaw 1009 an awm mek a, Official lamah DFDO in District Office enkawlin FEO – 1, FD – 3 (M/R - 1), LDC 3 (M/R – 2), Group D – 4 (M/R -1, Contingency M/R-1) an awm mek a ni.

Fisheries Department hian Office Building an la neih loh avangin District Forum Office an luah hawh mek a, tunah hian Office hmun tur an buaipui mek a Minister pawhin heng harsatnate hi hriatpuiin office hmun tura an beisei te pawh a hmunah a enfiah pui nghal a ni.

Khawtetlang, New Serchhip-a Department Godown leh Ice plant building te pawh Minister hian tlawhin harsatna an tawh te a enfiah pui a, Ice Plant hi kum 2013 a RKVY kaltlanga sak a ni a, Godown hi NLUP atanga sak ni thungin tunah hian electric connection leh water connection buaipui mek a ni a, a hnathawh tur ang thawkchhuak thei turin an peihfel tep tawh a ni.

Source: DIPR, Serchhip