BAWRHSAP HMA LAKNAIN MI PAWIMAWHTEN IT HMAN TANGKAI DAN TUR SAWIHO


Dated Serchhip, the 4th November, 2016: Vawiin hian Serchhip DC Conference Hall-ah Bawrhsap Dr. Lalrozama IAS hma laknain Serchhip District chhunga sawrkar office hrang hrangten awlsam zawka mipuite rawng an bawl theih nana Information Technology hman tangkai dan tur sawihona neih a ni a, Dr. Lalthlamuana, CEO, Mizoram State e-Governance Society leh IT Engineer rualte nen hun hman a ni.

Dr. Lalrozama IAS chuan, tunlai khawvelah IT in awlsamna min thlen nasa tawh hle a, tangkai takin Department tam takin an hmang mek a ni. Chutihlaiin tuna kan thlen china lungawi mai lova, hei aia hlawk zawka mipui leh sawrkar indawrna kawngah IT kan hman tam lehzual theih nan he inrawnkhawmna hun hi buatsaih a ni, a ti a. Department of ICT hotuten phur taka an tanpuina leh Department Head ho meuhva an rawn telpui avangin lawmthu a sawi a ni. Bawrhsap chuan, mipuite hian an mamawh thil tam tak, IT hmanga awlsam taka an hriata an neih mai theih, a kalphung kan la hriat tawk loh avanga kan la tih loh te, Department lam pawhin sum leh pai sen belh vak lova IT hmanga mipuite kan chhawpchhuah sak mai theih thilte kan la chhawp tawk lo deuh a ni thei a. Chung thilte chu haichhuaka Serchhip District pawhin a taka a kalpui ngei theih nan kalkhawmte chu uluk taka ngaihtuahna seng turin a ngen a ni.

Dr. Lalthlamuana, CEO, Mizoram State e-Governance Society pawhin thusawiin, Information Technology hmang hian sawrkar hnathawh tinreng hi awlsam zawkin a kalpui theih deuh vek mai a. Kan rin aia nasa in ram inrelbawlna kawngah awlsamna min thlen thei a ni, a ti. IT tangkai taka kan inrelbawlnaa kan hman chhoh zel theih nan Department ten mipuite hnena an phochhuah theihte mai bakah mipuite hian eng thil nge Department atangin kan beisei tihte pawh kan hriat tel a tula, chumi mil chuan IT behchhan indawrtawnna Programme kan siam thin. Mizoram ICT Department hnathawhte hi National Level pawha zahpuiawm loh tak takte an ni hlawm a, IT Engineer kan neihte pawh khawvel huap zirna tha atangtea kalchhuakte an ni, a ti a. Mizoram tana an hmachhawp hrang hrangte leh an hnawthawh tawhte a tarlang bawk.

Hemi hnu hian Mizoram State e-Governance Society atanga IT Engineer ten Mizorama hma an lak dan hrang hrangte, Department leh District Office ten an hman tangkai theih an Programme neih sate sawifiahna hun an hmanga, kalkhawmten zawhna hrang hrang zawtin, Serchhip District-a kalpui ve dan tur an zawt a ni.

He hunah hian Serchhip District a Head of Offices zawng zawng te, Serchhip District Joint Village Council hruaitute, Sub-Headquarters YMA hruaitute leh chanchinbumite an tel a ni.

Source: DIPR, Serchhip