LABOUR & EMPLOYMENT MINISTER-IN SERCHHIP-AH LABOUR WELFARE FUND SEM


Serchhip, the 4th October, 2013: Labour & Employment Minister Pu Lalrinliana Sailo chuan vawiin chawhnu dar 2:00 khan Serchhip DC Conference Hall-ah kuthnathawktute tanpuina Labour Welfare Fund a sem a, vawiina tanpuina dawngtute hi mi 671 niin tangkafai Rs. 24,62,000 sem a ni.

Health Minister chuan kuthnathawktu tanpuina sum dawng tura kalkhawmte chu lawmpuina thu hlanin Labour Welfare Fund chu mi hausa leh mirethei inkar zau lutuk tihzimna tur atana Sawrkar hmalakna pakhat a ni a ti a, Supreme Court thuchhuak angin Contractor te hnenah hna an hmuh apiangin 1% Labour welofare Fund atan hian lak sak an ni a ti a, Contractor lian tak tak ten hna an thawhin mirethei leh harsa zawk te an chhawr thin a, hna an thawh zawhin sum tam tak nen min liamsan leh diak a, hna hahthlak zawng zawng thawktu labour te chu harsatna ngai reng kan tawk thin a, mahse Labour welfare Fund chuan heng harsatna te hi awmze nei zawka tlem tal pawh a sutkian sak kan beisei a ni a ti a; Labour Welfare Fund hi kuthnathawktu mi chi hrang hrangin an dil thei a, Insakna a thawkte leh mau sat a inhlawhte pawh an leng vek a, mi hnuaia kuthnathawka eizawng tu te zawng zawng chu a huam vek a ni tiin la inregister lo te pawh in register thar turin a sawm a, he scheme hi kalpui reng anih tawh tur thu leh Labour te tana hamthatna tura siam dan chi hrang hrang tunah hian zirchian mek a ni a, heng te pawh hi hman thuai theih turin nasa taka tan lak a ni a ti bawk.

Health Minister chuan Corruption awm lova an Sawrkar hun an hmangral thei tur chu lawmawm tih thu sawiin Pathian leh mipuiten an chunga rinna an nghah vang liau liau a hetiang dinhmun hi thleng thei an nih thu a sawi a, Sawrkar laipuiin mirethei te tana damdawia inenkawlna tura dan thar a siam RSBY hnuaia in register turin Job Card holder te a sawm a, RSBY hnuaiah hian damlo te damdawiin a in admit kher lo, OPD a inentir te pawhin tanpuina an dawn theihnan ruahmanna thar siam a ni a, a enchhin nan India ram pumpuiah District pahnih thlan chhuah a ni a, chung zinga pakhat chu Serchhip District a ni a ti bawk. Job Card neilote pawh Mizoram Healthcare Scheme chhawr tangkai turin a chah a, damlo chhawmdawlna tur sum pawh a tam tawk a ni a ti bawk.

Labour welfare Fund kaltlang hian kut hnathawktute hamthatna tam tak ruahman a ni a, kuthnathawktu in register te chu kum 60 an tlin hnu ah thlatin pension Rs. 400/- pek an ni a, an pension hma a an boral anih chuan Rs. 10,000/- in ral thin an ni a, an hnathawhna hmuna boral an nih chuan Rs. Nuaih hnih in ral an nih bakah an fate zirna atan te leh thil chihrang hrangah tanpuina a awm a ni.

Vawiina tanpuina sem hi Kuthnathawktu fate zirna, school admission an tih theihna atana ruahman a ni a, kuthnathawktu fa mipakhat zel tan Rs. 2000/- sem niin fa pahnih nei hnenah rs. 4000/- pek an ni a, fa pahnih aia tam nei mahse sawrkar laipui dan dinglai angin pahnih chin bak tanpuina hi pek theih ani lo thung a ni.

Minister hian tanpuina dawngtur te zinga thlan chhuah bik mi pahnih hnenah tanpuina hi a hlan a, a bak zawng chu Mizoram Labours’ Union hruaituten DC Office tualzawlah an sem chhunzawm a, vawiin dawng hman lo te tan pawh naktuk October ni 5, 2013 (Inrinni) hian Little Flower Convent Schhol, P&E Veng Serchhip-ah sem chhunzawm a ni ang a, a dawngtu tur te hnenah pek kim vek anih hma chuan Serchhip an chhuahsan dawn loh thu Mizoram Labours’ Union hruaitute hian an sawi a ni.

Minister hian Serchhip-a hun a hman zawh hian Labour Welfare Fund tho sem turin Thenzawl a pan nghal a, Thenzawlah hian tangkai Rs. 1,72,000/- a sem leh dawn a ni.

Source: DIPR, Serchhip