ATMA OFFICE THAR HAWNG


Dated Serchhip, the 4th August, 2016: Vawiin hian Agriculture Department Crop Husbandry Director Dr. C. Lalzarliana chuan, Serchhip District Agriculture Complex a Agriculture Technology Management Agency (ATMA) Office Building thar Cheng Nuai sawmhnih senga sak chu a hawng.

ATMA Office building thar hawnna inkhawm tawi hi Pu James Lalsiamliana District Agriculture Officer, District ATMA Project Director ni bawk chuan a kaihruai a. Khuallian Dr C Lalzarliana chuan Mizoram a Distrcit 4 a ATMA Office Building thar sak zingah Serchhip ATMA chu a tel thu leh vawiin ah Office Building thar tha tak an nei chu lawmawm a tih thu a sawi a. Serchhip District leh kan rama loneitute tana tangkai tak leh hlawk taka hnathawhna hmun a tana hman a nih ngei a beisei thu a sawi bawk.

Kan ram leilung atanga ei leh bar tur kan haichhuah thiam hi a tul tak zet a, chumi kawnga kan hlawhtlin theih nan ATMA chu dinhmun pawimawh taka ding a ni, Serchhip District ATMA te pawh theihtawp chhuah a hnathawk zel tura beisei niin in hnathawh hmel lo lang te chu kan lo thlir reng dawn a ni, a ti.

ATMA Office hi kumin February ni 24 khan sak tan niin July Ni 5 khan zawh fel ani a, a Building len zawng hi a dung feet 36 leh a vang Feet 24 niin, room 4 a awm a, a hnuai (Ground Floor) ah hian Training Hall tur a siam a ni bawk.

Serchhip Agriculture Departemnt hnuaia ATMA ah hian DAO te nen thawktu 11 awm mekin, DAO hi District tinah Project Director an ni nghal a ni.

Source: DIPR, Serchhip