BAWRHSAPIN CHANCHINBUMITE KAWM


Dated Serchhip, the 4th May, 2017: Vawiin hian Serchhip Bawrhsap Pi Sangchhin Chinzah, MCS chuan a pisaah Serchhip District Journalist te kawmna a nei a, ram leh mipuiten hmasawnna tha an awm chhoh zel theih nana thawhpuiah a sawm.

Pi Sangchhin Chinzah chuan, thuthar thehdarhtute chu mipuite sukthlek siam saktu an nih avangin an pawimawh em em a, a tha zawng leh a chhe zawng pawhin mipuite hi an kaihruai thei hle a ni. Hei vang hian Serchhip District MJA te pawh a tha zawnga mite zirtirtu, ramin hma a sawn zel theih nana mipuite kawhhmuhtu an nih zel a beisei thu hrilhin kawng tinrengah anmahni thawhpui turin a inralring reng tih a hrilh a. A tulna a piangah finchhuah thin turte, inpawh tlang taka an ngaimawh zawngte sawipui thin turin chanchinbumite hi a sawm a. Serchhip District ah thawhpui tur MJA tha tak a din avanga a lawmthu a sawi bawk.

He inkawm honaah hian Pu C Lalhminghlua, Serchhip MJA President pawhin thu sawiin, Serchhipa hun engemawchen lo awm tawh, Serchhip hrechiangtu leh intineitu tak mai Bawrhsapa a rawn thu chu lawmawm a tih thu leh Serchhip mipuite pawh an thlamuang hle nia a hriat thu a sawi a. Inkawm hona hun a buatsaih sak avang leh MJA tana inhawng taka hna thawk duh mi a nihnaah lawmthu a sawi bawk.

He hunah hian Serchhip MJA General Secretary Pu Zonunsanga Kawlni chuan MJA member te nena inhmelhriat tirna hun a hmanga, member dangten an duhzawng sawina hun an hmang bawk a, chhun thingpui tuihnai tak an in ho nghal a ni.

Bawrhsap Pi Sangchhin Chinzah hi Addl DC Pi Zosangzuali Pachuau, SDO Sadaar Pu R. Vanrengpuia leh Serchhip DIPRO Pu K. Saitluanga ten an tawiawm a, MJA lam atang pawhin member te an kal tha hle a ni.

Source: DIPR, Serchhip