SERCHHIP BAZARA SUMDAWNGTE BUKNA HMANRUA ENDIK


Dated Serchhip, the 4th May, 2017: Vawiin hian Serchhip Bazar Buildinga chawhmeh zuartute bukna hmanruate chu Legal Metrology Department ten an endik sak.

Pu Lalsangzuala, Inspector, Legal Metrology Serchhip chuan Bazar Buildinga chawhmeh zuartu mi 12 te chu an bukna hmanrua endik sak tura a koh angin Legal Metrology Office ah endik sak an ni a, an bukna leh buk lungte uluk tak endik sak niin siam rem ngaite an siam rem sak a, heng an bukna hmanrua te hi a tha thawkhat a, fee pawh dan anga laksak an ni bawk a ni.

Pu Lalsangzuala chuan Standard of Weights and Measures (Enforcement) Act, 1985, Section-24 Chapter-VII in a phut angin sumdawng, bukna leh tehkhawng hmanrua hmangtute reng reng chuan kum tinin an hmanruate chu endika chhinchhiah tir tur a ni a, endiknaah hian fee pawh dan anga pek nghal tur niin, endik loh hmanruate chu dan anga man theih an ni a, lung in tan tir thlenga hrem theih an ni, a ti a. Sumdawng an kohte thuawih tak an hmanrua endik tir thinte chungah lawmthu a sawi a, thuawih ve lote chungah erawh dan anga hremna pek an ni ang a ti.

Vawiin chawhnu lamah vek hian M/s P.B. Lalzuithanga Filling Station, Serchhip tlawhin Petrol (MS) leh Diesel (HSD) lo thlengte an endik a, heng tuialhthei lo thleng te hi a tha hle a, tuialahthei an dah khawlsa te pawh a tul anga endik zui zel an tum a ni.

Source: DIPR, Serchhip