SERCHHIP-AH RUALBANLOTE NI HMAN A NI


“Rualbanlo te mamawh ber chu kan lainatna leh khawngaih thilpekte ni lovin an dikna chanvo neihte dik taka an chan hi a ni” – Juhi Mukherjee


Serchhip, 3rd December, 2014: Vawiin chawhma dar 10:00 khan Social Welfare, SSA leh District Administration te ṭangrual huaihawtin New Serchhip YMA Hall-ah “Rualbanlote Ni (World Disabled day 2014)” hman a ni a, District Bawrhsap Pi Juhi Mukherjee IAS chuan khuallian niin a hmanpui a ni. Kumin rualbanlote ni atana thupui thlan chu ‘Tunlai thiamna changkang zawkte hmanga hmasawnna ngelnghet neih’ ‘Sustainable development – the promise of technology’ tih a ni.

Khuallian Pi Juhi Mukherjee chuan rualbanloten an mamawh ber chu kan lainatna leh khawngaihna thilpekte ni lovin, dan hnuaia an dikna chanvo neihte dik taka an chan hi a ni a, chumi kawnga lo ṭanpui chu mitin mawhphurhna a ni a ti a. Rualbanlote humhalhna Dan chungchang pawh sawiin, a chang chuan kan Dante ngei pawh hian rualbanlote tan hian harsatna a siam ṭhin a ni a ti a, rualbanloten an rualbanloh tihchianna Certificate an mamawh kher te, chutiang lak pawh chu thil awlai lo tak a nih bakah a nachang hre lo pawh tam tak an awm a ni tiin ram leh khawtlang rawng bawl tura tih theih tam tak an neihte an hlenchhuah ve theih nana Dan ṭha zawk hmanga kawng zau zawk kan hawnsak a hi a hun tawh a ni a ti. Rualbanloten puala hna hauh sak chungchang pawh sawi langin, sawrkar hna a 3% hausak chauh hi a tawk lova, Private Company, sumdawng pawl lian tak takah te pawh reservation siamsakna Dan hi neih a ṭulin a hun hle tawh a ni a ti bawk.

Khuallian chuan khawvel pumpuia rualbanlo 80% chu ram ṭhanglaia cheng an ni a, sawrkarin tunlai thiamna thar hmanga hmasawnna ngelnghet siam a tumnaah, heng rualbanlote hian engkim an tih ve theih tho avangin an rualbanlohna kawng a zira, zirna leh eizawnna an kalpui dan kawng zawnsak a, remchang siamsak hi sawrkar leh mipuite mawhphurhna a ni a ti bawk.

Rualbanlote Ni puala inkhawm buatsaih hi Pu VL Remliana, MCS, Addl. DC chuan a kaihruai a, Shalom Special School naupang ten an thiamthil te an entir bakah rualbanlo ten an siam, inchhung bungrua leh hmanraw chi hrang hrangte pho chhuah a ni a, Serchhip leh a chhehvel khua aṭangin rualbanlote leh an chhungte mai bakah khawtlang hruaitute leh sawkar official ṭhahnem takin an ṭawiawm a ni. Vawiin chawhnu khan Rualbanlote enkawl leh chanvo humhalh sak chungchang sawihona Serchhip DC Video Conferencing Room ah neih a ni a, mipuite thlir turin chhawpchhuah ani ang.

Source: DIPR, Serchhip