SERCHHIP-AH MP MODEL VILLAGE CHUNGCHANG ZIRCHIANNA HUN HMAN A NI


Serchhip, 3rd December, 2014: Mizoram Sawrkar Rural Development Department leh State Institute of Rural Development (SIRD) tangkawp buatsaihin vawiin khan Serchhip DC’s Conference Hall-ah “MP Model Village/Saansad Adarsh Gram Yojana (SAGY)” chungchang zirhona hun hman a ni a, Pu Lalengmawia Vantawl, MCS, Deputy Secretary, RD leh SIRD mithiam ten SAGY in a kaihhnawih Department officialte zirtirna an pe a ni.

Vawiin workshop sawi hawngtu Serchhip District Bawrhsap Pi Juhi Mukherjee, IAS chuan Serchhipa kum hnih chuang a awm tawh thu leh official hrang hrangte chakna leh chaklohna a hriatchian tawh thu sawiin an chakna leh theihna nasa lehzuala hman theihna hun SAGY kaltlanga a in hawng thar chu lawmawm a tih thu leh hnathawh thuai thuai a chakawm tawh a a hriat thu a sawi a, Centrally Sponsored Scheme hrang hrangte Model Village tihhmasawnna atan hian chhunkhawm tur a ni a, Department hrang hrangte thawhhona tha a pawimawh lehzual dawn hle a a hriat thu leh he Scheme thar hi hunbi tiam nei a thawh tur anih vanga inthlahdah hman anih dawnloh thu a sawi a, rilru inhawng tak leh tha tho taka thawk turin official kalkhawmte a chah a ni.

SAGY chungchang sawifiahtu Pu Lalengmawia Vantawl chuan SAGY chu India Prime Minister Narendra Modi-an India Hnam pa Mahatma Gandhi a duhthusam pakhat tihhlawhtlin a tumna hmanrua ani a ti a, Lok Sabha MP leh Rajya Sabha MP ten an bial chhunga khua pakhat ve ve Model Village atan hian an thlan theih thu sawiin Lok Sabha MP Pu C.L.Ruala’n Serchhip District a Khawlailung khua a thlan thu leh Pu Ronald Sapa Tlau, Rajya Sabha MP pawhin Serchhip District ami tho Chhiahtlang khua a thlan thu a sawi a, heng model village te tihhmasawnna tura hmalak dan tur te a sawi a ni.

Lok Sabha MP leh Rajya Sabha MP te hian nakkumah Model Village dang pakhat ve ve an thlang leh dawn a, kum 2019 ah chuan model village pathum ve ve thlang hman tura beisei niin kum 2024 thleng kumtin Model village pakhat ve ve an thlan belh zel dawn a ni. SAGY ah hian a hranpa a sum ruahman a nil ova Centrally Sponsored Scheme hrang hrang 31 ten priority village ah neiin heng CSS atanga pawisa awm sa atang hian hma lak ani dawn thung a ni.

SAGY hi October ni 11, 2014 khan India Prime Minister Narendra Modi-an New Delhi ah a puang a, MP ten Model Village a an puan te tihhmasawnna tur ruangam Village Development Plan chu a bialtu Bawrhsap kaihhruaina hnuaiah May ni 11, 2015 hma in peihfel vek tur niin peihfel anih atanga thlakhat ral hma in hnathawhna tur sum pawh pekchhuah hman tura ruahman a ni.

Vawiin Workshop hi Pi Teresy Vanlahruaii, MCS, Project Director, DRDA, Serchhip in a kaihruai a, chawhma lamah SAGY chungchang inhrilhfiahna hun hman niin chawhnu lamah hnathawh dan tur ruangam sawihona hun hman a ni.

Naktuk hian Khawlailungah khawtlang hruaitute tan SAGY chungchang inzirtirna leh inhrilhfiahna hun hman a ni ang a, naktipah Chhiahtlangah hun hman a ni bawk ang.

Source: DIPR, Serchhip