SERCHHIP BAWRHSAP HOVIN CABLE TV DIGITIZATION CHUNGCHANG MEETING NEIH A NI


Serchhip, 3rd November, 2015: Sawrkar Laipuia Minitry of Information & Broadcasting in tuna Analogue Cable TV Network te hi December 31, 2015 ral hmaa Digital Addressable Sysytem (DAS) a thlak vek tura thupek a chhuah chungchangah Serchhip District Urban Areas ( Serchhip, Thenzawl leh North Vanlaiphai) a Cable TV Operator te chu Vawiin chhun dar 12:00 khan District Bawrhsap, Dr. Lalrozama, IAS hovin DC Office-ah an thukhawm.

Vawiin thutkhawmah hian Cable TV Operator te chuan theihtawpa hma an lak thu an sawi a, Serchhip District Urban Area-a Cable TV Operator te chuan LPS (MSO) te nen inremna siamin an hnuaiah hian hma an la mek a, Local Cable Operator anga awm turin LPS nen inremsiam mekin, MSO hnuaia hnathawk tur an nih avangin Aizawl lama an hmalak dan ngaichang chungin hna an thawk mek tih an sawi a, hun tiam chhunga MSO an inpeih hman chuan Serchhip District chhungah pawh Digitization hi kalpui ve nghal turin an inruahman a ni.

Cable TV Digitization hi kalpui anih theihna tur chuan subscriber tin ten set top box an nei vek tur a ni a, hei pawh hi a supply tu turte nen inbiak chhoh mek zel niin, set top box hi TV pakhat atan pakhat zel hman tur a ni dawn a, Subscriber te hian an duh chuan anmahniin an lei thei dawn bawk a ni.

Operator te hian an subscriber te hnenah a theih angin Cable TV digitization chungchang hi inhrilhriat/awareness neih nise tiin vawiina meeting an neih ah hian an sawi bawk a ni.

Source: DIPR, Serchhip