SERCHHIP AH RUALBANLO ENKAWL DAN TUR INZIRTIRNA HUN HMAN A NI


Serchhip, 3rd November, 2015: National Institute for Mentally Handicapped (NIMH), Secunderabad leh Social Welfare Department, Government of Mizoram tangkawpin Serchhip District chhunga ICDS Project hnuaia thawktu te tana an buatsaih buatsaih ni li awh tur "rualbanlote mahni ke a an dinchhuah theihna tur atana inzirtirna" hun hawnna inkhawm vawiin chawhma dar 10:30 khan BNRGSK Hall, Serchhipah neih a ni a, Serchhip District bawrhsap Dr. Lalrozama, IAS chu khuallian a ni.

Khuallian chuan Training hawnna inkhawmah thu sawiin rualbanlote hmakhaw ngai tak leh an hamthatna ngaihtuah chunga hetiang hun buatsaih a ni hi lawmawm hle a ni a ti a, tun hma deuh chuan rualbanlote hi biak nawmnah leh chhaih mai maite kan ching thin a, tunah erawhchuan anmahni enkawl kawngah Mizo mipuite kan thangharh ta viau niin a hriat a, a lawmawm hle a ni a ti. Rualbanlo kan tihte hi keini ai hian an famkimin an awhawm zawk chang hi a awm fo thin a, an rilru a thianghlimin Pathian hi an hnaih bik hle in a hriat thin a ni a ti a, rualbanlo te enkawl kawngah nasa lehzuala tan kan lak a ngai a, thenkhat chu enkawl viau pawh a hma lam pan thei chuang lo turte pawh an awm thin, heti chung pawh hian tha thlah lova anmahni ke a an din ve theihna tura kan chhawmdawl zel hi a tul hle a ni a ti.

Training hawnna inkhawm hi Pi Chuauzikpuii, Asst. Director, Social Welfare Department in kaihruaiin training buatsaih a nihna chhante a sawi a, kum 2011 chhiarpuia a lan danin Mizoramah hian rualbanlo mi 15680 an awm mek a, heng mite hi an rualbanloh dan a in ang lova, sawrkar department dangte nena tang hovin Assesment Camp te buatsaih thin niin, mi 9500 vel chu an harsatna hriatchian sak an ni tawh a ni a ti. Zirlaite zinga harsatna nei ten eng tanpuina nge an mamawh tihte zawn chhuah a, tanpui theih dan kawngte zawn zel hi a tul hle a ni a ti bawk.

Training hawnni ah hian ICDS hnuaia thawktute an kal tha hle a, Serchhip ICDS Project hnuaia thawktu mi 50 leh E.Lungdar ICDS Project hnuaia thawktu mi 7 an tel thei a, rualbanlohna chi hrang hrang te hriatchhuah dan leh a thawktute hriatturte inzirtirna hun hman a ni a, Damdawi lama thawktute, Chhawmdawlna In a thawktute, nu leh pate, zirlaite leh zirtirtute tan pawh training hi buatsaih zel tum a ni.

Training ah hian Resource Person atan Dr. Nebedita Patnaik, Lecturer in Special Education, Dr. Srinivas, Lecturer in Speech & Hearing, National Institute for Mentally Handicapped (NIMH), Secunderabad leh Pu Albert MS Dawngliana, IE Coordinator, SSA Aizawl te hman an ni a, training hian November ni 6, 2015 thleng a awh ang.

Source: DIPR, Serchhip