SERCHHIP BAWRHSAP LEH SUB-HEADQUARTERS YMA, SERCHHIP OFFICE BEARERS TE INKAWM


Serchhip, 3rd May, 2016 : Sub-Headquarters YMA, Serchhip Office Bearers ten nimin tlai khan Serchhip District Bawrhsap Dr. Lalrozama, IAS chu a pisa ah hmu in thla hmasa a Sub-Headquarters YMA inkhawmpui Zote South a an thurel zinga mi tuihna humhalh, luidung nungcha, ramngaw leh ramsa humhalh chungchanga thawhho dan tur leh hmalak dan tur an sawipui a, District Bawrhsap hi Pu VL Remliana, MCS, Addl. DC leh Pu Andrew H. Lalremruata, MIS, DIPRO ten an tawiawm a ni.

Bawrhsap chuan Sub-Headquarters YMA hruaitu ten ram leh khawtlang hma ngai tak chunga ngaihtuahna an seng leh hma an la chu fakawm a tih thu sawiin khawtlang tangrual duhdana ke pen anih phawt chuan an hlawhtling ngei ngei a a rin thu a sawi a, thahnemngaih luat tuk vanga petek sual palh na lakah erawh inven thiam tula a hriat thu sawiin YMA inrawlhna tur chi leh chi loh pawh thliar thiam a tul hle a a hriat thu a sawi bawk.

Sub-Headquarters YMA hruaitute chuan Serchhip District chhunga tuihna a tlem chak zia chu an vei thu leh lui hnar leh lui dunga thing phun uar tula an hriat thu te, thingphun tawh sa enkawl uluk a tul thu te, ;luidung nungcha humhalh kawngah luidung humhalhtu khaw hrang hrangte inkhuangrual deuh hleka kal tha a an hriatthu te, ngaw thar siam tura tanlak a tul thu te leh ramsa humhalh kawnga rualkhai taka tanho a tul thu te sawiin Sawrkar Department hrang hrangte nen thawhhona tha lehzual neih tula an hriat thu te an sawi a, Bawrhsap pawhin heng an thilsawi chi hrang hrangte hi tha a tih thu leh a kaihhnawih Department hrang hrangte nen inkawmho a, tlang tak leh inpawh tlang taka hmalak ho dan tur leh thawhho dan tur sawiho tha a a hriat thu leh chumi tur chuan hma lak a tum thu in a chhang a, MEFCOF ten "Zotheihuan" siam tura hma an lakna te pawh Sub-Headquarters YMA hruaitute hi lo hrilhfiahin thawhho dan ngaihtuah tha a a hriat thu a sawi bawk.

Heng bakah hian Sub-Headquarters YMA hruaitute chuan MLPC Act, 2016 Sec 42 leh 43 khauh zawka ken tula an hriat thu te, Tribal Certificate leh Residential Certificate pekchhuah chungchanga fimkhur chhunzawm zel pawimawh an tih thu te leh thilpawimawh dang dang an sawi a, Bawrhsap chuan uluk taka ngaihthlak sakin hmalakna tur atana tha ni a an hriat te an sawiho a, a tul anga ngaihtuah chhunzawm zel tha an tih thu an sawi a ni.

Source: DIPR, Serchhip