SERCHHIP-AH FAINA HAPTA “SWACHH BHARAT MISSION CLEANLINESS WEEK, 2015” HAWN A NI


Serchhip, 2nd October, 2015 : UD&PA Department, Serchhip District hmalakna in tukin dar 7:00 khan Serchhip Bazar Kawn ah rampum huap “Faina Hapta” Swachh Bharat Mission Cleanliness Week, 2015 (October ni 2 – October ni 9, 2015) hawnna inkhawm neih a ni a, Serchhip Distrct Bawrhsap Dr. Lalrozama, IAS chuan khuallian niin a hawng a ni.

Hawnna thu sawiin Bawrhsap Dr. Lalrozama chuan Serchhip District bawrhsap mawhphurhna a chelh hnu a mipui vantlang hma a a din hmasak ber na anih thu a sawi a, Serchhip khawchhung a fan tawh chin chu fai tha thawkhat hle a a hriat thu leh kum hmasa lama Faina kawngah Sawrkar leh mipuite hma lo lak tawhna rah ni a a hriat thu leh lawmawm a tih thu a sawiin abik takin Sanitation Officer leh a thawhpuite fakawm a tih thu a sawi bawk. Bawrhsap chuan Faina Hapta bik hi a hranpa a ruat ni thin mahse a pawimawh ber chu kan thinlung chhungah Faina Hapta kumtluana hman duhna kan tuh hi a ni a ti a, hmasawnna innghahna bulpui chu faina a ni tiin faina atang hriselna a in tan a, rilru leh taksa a hrisel chuan taimakna leh hnathawh phurna a thlen a; chu chuan chhungkua leh khawtlangah rah tha tak a chhuah tel bawk thin a ni tiin faina kawnga nasa leh zuala thawhpui atan Serchhip mipuite a sawm a ni.

Serchhip District-a urban town a chhiar khaw pahnih dang Thenzawl leh North Vanlaiphai ah te Faina Hapta pual hian SDO(C) te kaihhruaina hnuaiah programme siam a ni bawk a, Faina Hapta hman chhung hian Serchhip khawpui huamchhunga Village Council tin in an huamchhung tihfai hnatlang runpui an buatsaih dawn a, an ni bakah hian Sawrkar Pisa, Zirna In leh Kohhran hrang hrangte hnenah an hmun hma tifai tura ngenna siam niin Taxi, Auto Rickshaw, Pick-Up leh Maxicab Service te pawh an dinna (stand) tifai tura ngen an ni bawk. Swachh Bharat Mission Cleanliness Week, 2015 pual hian inelna chi hrang hrang YMA Branch fai, Sawrkar Pisa fai, School fai, Lemziak intihsiak (Primary leh Middle School), Essay inziahsiak (High School), Au Hla (Slogan) inziahsiak leh Photography competition te huaihawt a ni a, Week kharna inkhawm October ni 9, 2015 a neih anih hunah lawmman te hi sem a ni ang.

Tukin Swachh Bharat Mission Cleanliness Week, 2015 hawnna inkhawm hi Pu Kapliana Pachuau, President, Serchhip District MJA in a kaihruai a, Swachh Bharat Mission Ambassador Pu Lalhmangaiha Chawngthu in fuihna thuchah sawiin Pu ST Lalhmingmawia, Sanitation Officer in report a pe a, hawnna inkhawmah hian Serchhip khawchhunga Sawrkar Pisa hrang hrang hotute, Tlawmngai Pawl hrang hrang aiawhtem thuthar thehdarhtute bakah Bharat Scouts & Guides, NCC leh NSS te an tel a, hawnna inkhawm neih zawh hian Serchhip Bazar leh a chhehvel tihfai hnatlang neih chhunzawm nghal a ni.

Source: DIPR, Serchhip