INTEGRATED AYUSH HOSPITAL HEALTH MINISTER IN A TLAWH


Dated Serchhip, the 2nd September, 2016: Vawiin hian Health Minister Pu Lalthanzara chuan Thenzawla Integrated AYUSH Hospital, hawn mai theiha peih thawkhat tawh chu a tlawh a. Hnathawktute a kawm nghal.

Thu sawiin Pu Lalthanzara chuan Northeast India-a a awm chhun Integrated AYUSH Hospital tha tak kan neih theih nana sul lo sutu Health Minister hmasa Pu Lalrinliana leh Chief Minister Pu Lal Thanhawla te chungah lawmthu a sawi a, an ni hmalakna avanga hetiang Hospital nei thei kan nih thu a sawi. Health Department lamin theihtawp an chhuah avang leh Contractor te thahnem ngaihna a zarah a building pawh a tha in a rintlak hlea a hriat thu a sawi a, an thawhrimna te avangin lawmthu a sawi bawk. Tin, Thenzawl khaw chhunga hmun zau leh nuam tak, a thlawna petute hnenah lawmthu a sawi bawk a ni. Minister hian, he Hospital hi helai vela khaw hrang hrangte ta, mipuite tana din a nih avangin a neitute an ni tih inhre turin mipuite a ngen a. An ta a nih ang ngeia duat nachang hriatpui turin a ngen a ni. State hrang hrang aiawh meeting ah vawi tam tak a tel tawh thu sawiin State tam tak mipuite chuan AYUSH Hospital hi bawh nasa hle a, Mizo mipuite pawhin kan bawh nasat tial tial a rinawm hle a ni, a ti.

Minister tawiawmtu Principal Director of Health & Family Welfare, Dr K Ropari pawhin thu sawiin AYUSH Hospital a damdawi supply te hi a thawktuten duh duha an lak khawm a ningawt lova, Government of India in a hranpa a a Approve Company te siam chauh an lak thin thu a sawi a, hna thawktuten thla khat emaw chuah la thawk mahse mipuiten an chhawr tangkai nghal hle a ni, a ti. Tin, Official takin hawn la ni lo mahse building a hman theih tawh avangte, damdawi supply a awm tawh avangte, thawktute pawh engemawzat lak an nih tawh avangin hna hi a rang lamin an thawh tir ta a ni, tih a tarlang bawk.

Minister in Integrated AYUSH Hospital a tlawh hi Dr. Rohmingthanga, Director, DHS leh Missions Director NHM, Dr. Lalbiakzuala te, leh Official pawimawh dangten an tawiawm a, an ni pawh hian thusawina hun an hmang hlawm a ni.

AYUSH Hospital Resident Doctor, Dr. HT. Zothanmawia chuan Report tlangpui pein August ni 1 atanga OPD an hawn tan thu leh vawiin thlenga damlo te an dawnsawn zui thu sawiin, thla khat liam ta chhung khan damlo 2506 zet an enkawl hman thu a sawi a, thawktu lamah hian Doctor 7, Staff Nurse 12, Lab Tech 2, Health Worker 4 leh Fourth Grade te an awm a, nitin inentir turin Thenzawl leh a thenawm khuate atangin damlo engemawzat in an pan reng a ni.

Thenzawla Integrated AYUSH Hospital hi Tualvungi Veng a sak niin, a hmun tur atan hian Pi Thangtluangi leh Pu Hrangzuala ten an ram hi a thlawnin an pe a ni.

Minister in Integrated AYUSH Hospital a tlawh hnu hian Thenzawla Community Health Centre pawh a tlawh nghal a, hnathawktute kawmin an hmunhma te fai leh thianghlim taka an lo enkawl avangin lawmthu a hrilh a, an mamawh chi hrang hrangte ngaihthlak sakin tih theih awm ang ang te hmalak pui a tum thu a hrilh bawk.

Source: DIPR, Serchhip