SERCHHIP-AH “MLA MODEL VILLAGE” CHUNGCHANG ZIRHO A NI


Serchhip, 2nd September, 2015 : Vawiin khan Serchhip DC Conference Hall-ah Saansad Adarsh Gram Yojana (SAGY) hnuaia MLA ten Model Village a siam tura an thlan khua te enkawl dan tur chungchang inzirtirna hun buatsaih a ni a, Pi Teresy Vanlalhruaii, MCS, Project Director, DRDA, Serchhip-in he workshop hi hawngin Pu Paul L. Khuma, MCS, Under Secretary, Rural Development Department chuan Powerpoint presentation hmangin zirtirna a pe a ni.

District Team of Trainers te leh MLA ten Serchhip District chhunga Model Village atana siam tura an thlan khaw hrang hrang vil tura ruat Charge Officer te tana workshop buatsaih hawngtu Pi Teresy chuan SAGY hlawhtling taka kalpui tur chuan thahnemngaih tak takna nen a thawh a ngaih thu sawiin he scheme atan hian a hranpa a tangka dah anih loh avangin ngaihtuahna sen uluk a ngai hle a, model village a siam tura thlan khua a cheng mipuite pawhin rilru zau tak leh thuawihna an neih a pawimawh dawn thu a sawi a, Infrastrucuture development ringawt nilova rilru leh taksa hriselna lam a hmasawnna te thlenga ngaihpawimawh a tul thu a sawi a, thil tha lam kawng tinrengah khaw dang te entawn tlak tura siam chu an thil tum ber anih dawn thu sawiin NLUP Line Department te leh SAGY Line Department te pawhin an scheme neih te nen convergence a hautak lutuk si lova hnathawh anih theih na tura ngaihtuahna an sen a tul dawn thu a sawi bawk.

Serchhip Distric-a Assembly Constituency pathumah hian MLA Model Village atana siam tura thlan khaw panga a awm a, Serchhip Assembly Constituency bialtu Mizoram Chief Minister Pu Lal Thanhawla chuan a bial chhung ami Buangpui thlangin Charge Officer atan Pu K.Lalhmuakliana, MCS, SDO(C) Thenzawl ruat a ni a, Hrangturzo Assembly Constituency bialtu MLA Pi Vanlalawmpuii Chawngthu chuan a bial chhung ami North Vanlaiphai thlangin Charge Officer atan Pi C Laltleipuii, MCS, BDO, East Lungdar ruat a ni a, Er. Lalrinawma, Tuikum Assembly Constituency MLA chuan a bial chhung ami Chhingchhip thlangin Charge Officer atan Pu Vanlalrova, MCS, BDO, Serchhip ruat a ni bawk.

Heng a chunga tarlan te bakah hian Tuikum Assembly Constituency huam chhunga khaw pahnih Baktawng leh Khumtung te chu Aizawl atang MLA Model Village atan thlang tu an awm a, Baktawng hi Aizawl West-III bialtu MLA Pu Vanlalzawma’n thlangin Charge Officer atan Er. Lalhruaia, Sr. EE, PHED, Serchhip ruat a ni a, Khumtung hi Aizawl West-II bialtu MLA Pu Lalruatkima’n thlangin Charge Officer atan Pu Vanlalrova, MCS, BDO, Serchhip ruat a ni bawk.

Aizawl lam atanga Serchhip District a khaw pahnih Model Village atana thlan an nih chhan chu heng MLA pahnih te bial chhung hi Urban area an nih ve ve vangin leh Urban area thlan theih anih si loh vang a ni.

Source: DIPR, Serchhip