LENG LAL SAIHNUNA FANAI CHAWMAWINA LUNGPHUN AH HOME MINISTER LEH FOREST MINISTER


Serchhip, 2nd March, 2016 : Vawiin khan Leng lal, hlaphuah thiam hmingthang Saihnuna Fanai chawimawina lungphun inkhawm Leng khua a Saihnuna Hall-ah neih a ni a, Environment & Forest Minister Pu Lalrinmawia Ralte chuan khuallian niin a hmanpui a, Home Minister Pu R.Lalzirliana leh Pu R. Vanlalvena, MLA te pawh he inkhawmah hian an tel a ni.

Khuallian Pu Lalrinmawia Ralte chuan Pu Saihnuna Fanai ropuizia leh ngaihsanawm zia sawiin lal nunnem, zaidam leh dawhthei, mi te khawngaihna ngah tak ani tih a hla thu atang te pawhin a hriat a, lal nimahse chapo miah lo, tlawm em em ani te hi mi rilru hnehtu a ni a, lal nichung si a nawmchen leh hlimhlawp ringawt buaipui lova vanram ngai tak leh Pathian zah taka a awm hian amah pawh a tizahawm lehzual a, a nun atang hian zirtur kan ngah hle a ni a tibawk. Mahni mihringpuite dikna leh chanvo inzah tawn sak a pawimawhzia sawiin Pu Saihnuna atang bawk hian zirlai tam tak kan zirtur a awmin ka hria a ti a, Pu Saihnuna Fanai chu a hun lai ngaihtuah a hmathlir nei thui tak anih thu sawiin nungchate hmangaihtu leh ramngaw humhalhtu anihna hi a ropuina pakhat a ni a ti a, Leng lal anih chhung zawnga Leng khua in ram lam leh in lamah kangmei an tuar lo chu thil chhinchhiahtlak tak a ni a, nungcha humhalh leh ramngaw humhalh kawng a khawvel harhchhuah hma in Pu Saihnuna chuan hma a lo hruai daih tawh a, kum 70 ral ta tawh a kangmei tichhuak lo tur te, tuihna humhalh tur te, a tawk te a sapel tura a khua leh tui te a lo zirtir thin te khan lal ropui tak a ni tih a lantir a ti bawk.

Pu R.Lalzirliana, Home Minister pawhin Leng lal Saihnuna Fanai chanchin ziahna bu tlangzarh in Pu Saihnuna a ngaihsan em avang leh a zah em avangin amah chawimawina lungphunah pawh sawm kher phut lovin ama mimal duhthlanna ngeiin a kal a ni tih a sawi a, lungphunna a a tel chu Sawrkara a dinhmun leh nihna ang zawnga thlir lo tura a duh thu sawiin chanvo engmah a beisei loh lai a Pu Saihnuna Fanai chanchin ziahna bu tlangzarh tura an sawm chu lawmawm a tih thu a sawi a, lusunte leh lungngaite hnem tura sermon ropui tak hla thu hmanga mizote min fah thin tu a ni tiin Mizoram, khaw 800 chuang awmna ah hian mitthi an awm a lumen leh mitthi chhungte kan inlenpui apiangin a hlaphuah pakhat tal kan sak ka ring a, hei vang hian a thu leh hla hi nitin leh zantin Mizoram chhungah hian kan sa ziah in ka ring a chu chuan zofate tana Pathian hriak thih ani tih lan chianna ah ka ngai a ni a ti bawk.

Saihnuna Fanai hi kum 1896 khan Thiak khua ah piangin pianpui unau mipa 2 leh hmeichhia 5 a nei a, kum 1915 December ni 26 ah nupui atan Lalzami, Khawhri lal fanu neiin fa 11 an nei a, July ni 5, 1921 ah Kristian-ah inpe in kum 1927 atanga a boral ni June ni 17,1949 thleng Leng lal a ni a, a lal hun chhung hi kum 22 a ni. Hla hi 100 vel bawr a phuah ni a hriat niin tunah hian 80 chiah hmuhchhuah a la ni a, a hla te hi midangte tana a phuah deuh vek niin hmun hrang hrang atang lusun khawhar ten an pan khawm thin a, a ina leng lo mikhual a nei deuh reng thin a ni tih amah hre pha tu ten an sawi a ni.

Saihnuna Fanai thlanlung hi Art & Culture Department in 13th Finance Commission kaltlangin Rs nuai hnih sengin Saihnuna Memorial Society leh Saihnuna tu leh fa te nen tangkawpin an tung a, Leng thlanmuala Saihnuna Fainai an zalhna lal chhungkaw thlanmualah tukin dar 9:30 khan Environment & Forest Minister-in ribbon chep chat in a hawng a, Leng MUP Unit ten hlado an chham bawk a ni.

Lungphun programme hi nizan atang khan tan niin Leng khaw mipui tangrual te ruahman angin zanin thleng hman tur a ni a, Saihnuna Fanain tu leh fa ten Se chal leh vawk pathum thawhin vawiin tlai khan ruaipui an buatsaih a, he lungphunna a tel tur hian Saihnuna Fanai tu leh fate bakah amah ngaisangtu leh ngaihlu tu mi tam tak Mizoram chhung hmun hrang hrang leh Mizoram pawn atang te an kalkhawm a ni.

Source: DIPR, Serchhip