PROPERTY RETURN TRAINING NEIH A NI


Dated Serchhip, the 2nd February, 2017: Vawiin hian Serchhip DC Conference Hall ah Serchhip District a Group A leh Group B Officers chin zawng zawngte puala Vigilance Department in Property Returns chungchang training ni khat awh a buatsaih chu, Bawrhsap Dr. Lalrozama, IAS chuan a hawng.

Dr. Lalrozama chuan, sawrkar kalphung a fel tual tual a, eirukna leh sumchhep relh thuah phei chuan sawrkar a fir tawh hle a ni. Hei vang hian sawrkar hnathawkten dan ang taka kan bungraw lei leh hralhte phalna kan laka, Vigilance lama in report zel a ngai. Chutiang tih dan tur min rawn zirtir tura Vigilance Department mithiamte ngeiin min rawn kal chilh hi a lawmawm hle a, bel taka lo hriat ngei kan tum theuh a tul ani, a ti.

A hawnna inkhawm tawi hi Pu R. Vanrengpuia, SDO Sadaar in a kaihruai a ni.

He mi hnu hian Vigilance Department atanga lokal Pu Vanlalzuala Chhangte, Superintendent leh Pu James Lalchhuanawma, Assistant ten Officer kalkhawmte chu chipchiar takin Property Returns fill-up dan an zirtira, an hriat chian loh leh zawhna an neihte sawihona hun an hmang nghal bawk.

Vigilance Department hian tunlai hian sawrkar hnathawk Officer chin zawng zawngte Property Returns hi an Department website-ah mipuite hmuh theih tura dahchhuah tumin hma an la mek bawk a ni.

Source: DIPR, Serchhip