SERCHHIP-AH WORLD AIDS DAY HMAN A NI


Serchhip, 1st December, 2014: Vawiin December ni 1, “World Aids Day” denchhenin Serchhip Chief Medical Officer’s Conference Hall, JN Hospital ah hun pawimawh tak hman a ni a, thupui atan “Focus, Partner, Achieve; An AIDS Free Generation” tih hman niin Dr.ZD.Lalmuanawma Medical Superintendent, JN Hospital chu khuallian a ni.

Thuchah sawitu Khuallian Dr. ZD Lalmuanawma chuan, AIDS dona kawngah mitin te kan tan tlan a tul tawh a ni tiin, he ni hmang tura zirlai kal khawm te chu an thiante leh AIDS chungchang la hreve lo midangte hrilh hria a tanpui ngai te tanpui kawngah pawh theihtawp chhuah turin a chah a ni.

Khuallian chuan Mizoram leh Khawvel a AIDS dinhmun tarlangin,Mizoram ah a hun hma (nupui pasal neih hma) a Sex hman a hluar in HIV +ve darh chakna ber pawh Sex hman vang a nih thu a sawi a, he ni hmang tura kalkhawm zirlaite chu nupui pasal neih hma a sex hmang lo turin a chah bawk a ni. Kumin a World AIDS Day thupui ang takin AIDS dona kawngah hian mitin hian mawhphurhna kan nei a, kan mawhphurhna theuh te kan hlen chhuah chuan AIDS awmlohna thangthar khawvel kan siam thei ngei ang a ti bawk. Pu Muante a chuan HIV+ve leh AIDS veite kan endawng hian khawtlang leh ram ah a chhe zawng in nghawng a nei thui hle a ni tiin, endawng lova tanpui zawk hi kan tihtur a ni tih hre thar leh turin kalkhawmte a chah bawk.

He huna thusawitu dang Dr. Rita Lalrampari, MO, ICTC Serchhip Hospital chuan World AIDS Day chu kum 1st Dec.1998 a tanga hman tan niin, khawvel pumpui in a huhova AIDS kan dona ni hun pawimawh tak a ni a ti a, he ni atang hian AIDS chungchang kan zir leh hriat te a taka kan hman tanna ni nise a duh thu a sawi bawk. Pi Rita-i chuan tleirawl kan nih laia kan nun fimkhur loh chuan HIV, AIDS hian min hual renga, a hrik kai mai thei reng kan ni a ti bawk.

Serchhip a World Aids day hman hi Project Axshya, Christian Medical Association of India, DIC, District TB Forum, ICTC Serchhip Hospital leh NSS Unit GHSS Serchhip tangkawp te bul tum a neih a ni. NSS Unit Govt HSS Serchhip ten an Sikul atanga Banner leh Placard a AIDS dona thuziak hrang hrang kengin CMO Conference Hall thleng he ni pual hian kawng an zawh a ni.

Kum 1990 atanga March 2014 thleng in Mizoram ah Thisen test 2,72,081 zingah HIV +ve mi 8883 awmin AIDS vanga thi mi 515 an awm tawh a, HIV+ve hmuhchhuah zingah hian 68% chu hmeichhiat mipatna a vanga kai niin, 25% chu inchiu na atanga kai niin, 3.69% chu nu in a naupai a a kaichhawn niin thildang atanga kai 2.78% an ni a ti a, HIV +ve zingah hian kum 14 hnuailam 354 awmin, kum 15-24 zingah 1991, kum 25-34 inkar mi 3748 awmin kum 35-49 inkar 2415 leh kum 50 chung lam mi 375 an awm a ni.

Serchhip a World AIDS Day puala hun hman hi Dr. Lalhlunpuii, M.O, RNTCP JN Hospital in a kaihruai a, Zaithiam zai ngaihthlak niin, HIV+ atangin Testimony benglut tak ngaihthlak a ni bawk.

Source: DIPR, Serchhip