SERCHHIP FAINA HAPTA HAWNG


Dated Serchhip, the 1st October, 2016: Tukin zing dar 7:00 a.m khan Serchhip DC Office tualah Faina Hapta 2016 hawnna inkhawm neih a ni a, Addl. DC Pu VL Remliana chu khuallian niin a hawnna hun a hmang a, Mahatma Gandhi lim chu pangparthi a awrh tir bawk.

Khuallian Pu VL Remliana chuan, Serchhip chu khaw fai tak nia a hriat thu sawiin, mahni in leh a chhehvel tifai lai hmuh tur an awm reng mai chu a fak a. Faina Hapta chu an lo fai reng thin tawhna chawinung zel tura inpek tharna hun a tan hmang se a duh thu a sawi. Kan in leh a chhehvel, leh kan bungruate chu chulhnuma, chulmam fo thin turte, a bik takiin in leh a chhehvel te phei chu a khat tawka rawng hnawih thar nachang hriat a that thute a sawi bawk.

Faina Hapta hawnna inkhawm hi Mizoram Journalist Association, Serchhip District President Pu C. Lalhminghlua'n a kaihruai a, Serchhip Sanitation Officer, Pu Lalfakawma Chhakchhuak, DLAO ni bawk chuan India ramin Faina Hapta a hman tan dan leh Mizoram leh Serchhip District in a hman thin dan Report tawi a pe a. Kumina Faina Hapta Serchhip District-a kalpui dan tur tlang pui a sawi bawk. Serchhip ah chuan Veng fai inelna buatsaih a ni a, hetah hian Veng fai pathum bakah Veng fai lo pathum thlan chhuah tum a ni. Zirna In leh sawrkar Pisa zawng zawngte tan inelna buatsaih a ni bawk a, Taxi Stand te, Auto Stand te leh Sumo Stand te tifai tura ngen an nih bakah kohhran zawng zawng pawh an hmunhmate tifai tura ngen an ni a, School zawng zawng te chu he Hapta chhung hian an zirlaite hnenah Faina lam hawi zirtirna vawi khat tal nei theuh tura ngen an ni bawk. Hengte bakah hian Dt.4.10.2016 (Tuesday) khian Serchhip khaw chhungah zirlai naupangten Faina Rally an nei dawn bawk a ni.

Serchhip mai bakah N. Vanlaiphaiah leh Thenzawlah te Faina Hapta hi vawiin vek hian hawn a ni a, khaw dang te pawhin he Hapta denchhen hian mahni in leh a chhehvel te, vantlang hmun leh puipunna hmunte tihfai nan an hmang dawn a ni.

Kan hriat theuh angin Faina Hapta hi India Hnam Pa Pu Mahatma Gandhi piancham, October ni 2 atanga ni 7 inkara neih thin a ni a, amaherawh chu kuminah hian Octoberni 2 hi Pathianni a nih avangin vawiin October ni 1 hian a hawnna buatsaih a ni a, a kharna hun erawh chu October ni 7 ah buatsaih a ni thung ang. Serchhip ah hian kum dangah chuan a hawnna hi Bazar hmun zau laiah buatsaih thin a ni a, kuminah erawh chuan DC tualah Mahatma Gandhi a lim kiangah a hawnna hun hi hman a ni thung.

Source: DIPR, Serchhip