SERCHHIP-AH PRADHAN MANTRI MUDRA YOJANA LOAN SEM CHHUAH A NI


Serchhip, 1st October, 2015 : Vawiin chawhma dar 11:00 khan State Bank of India, Lead Bank Office, Champhai bultumin Serchhip DC Conference hall-ah Sawrkar Laipuiin sumdawnna tenau (micro enterprise) tanpuina tura ruahmanna thar a siam “Pradhan Mantri MUDRA Yojana” chungchang inzirtirna leh hemi scheme kaltlanga beneficiary hmasa berte hnena loan semchhuah na programme hman a ni a, Serchhip District Bawrhsap Dr. Lalrozama, IAS in he hun hi khuallian niin a hmanpui a ni.

Bawrhsap chuan mi tumruh leh taima ten eizawnna mumal leh ngialnghet zawk an neih theihna tur atana tanpuina kawng thar tha tak mai Sawrkar Laipuiin a ruahman chu thil lawmawm tak anih thu sawiin a hmahruai atana loan dawng tura thlan te chu lawmpuina thu a hlan a, an loan lak chu tangkaipui ngei tura chahin an hman dan azirin anmahniin an hlawkpui mai bakah nakin zel atan midangte kawng sial sak tu an ni thei a ni a ti a, loan dik taka an hman a an rulh that chuan Bank thuneitute pawhin an duhsak in loan tha leh lukhawng nei lian zawk te pawh dil chhuah a harsat loh dawn thu leh midang loan la ve duh te tan pawh harsatna awmloh phah dawn a, midang tana kawng sial tu an nih theih rualin kawng ti ping tu an nive theih tho ani a ti a, midangte tana malsawmna nih tumna rilru nen dik tak leh rinawm taka an loan lak te chhawr tangkai turin a fuih a ni.

“Pradhan Mantri MUDRA Yojana” hnuaiah hian Loan chi thum pek theih a ni a chung te chu :
1) Shishu Loan: Rs.50,000 chin (business bul tan na tura sum mamawh te tan)
2) Kishor Loan: Rs.50,000 atanga Rs 5,00,000 thleng (business bul tan tawh, la insawhnghet chiah lo te tan)
3) Tarun Loan: Rs. 5,00,000 atanga Rs. 1,000,000 thleng (business insawhnghet pangngai tawh, huang zauh duh te tan)

Loan hi kum nga chhunga rulh tur niin a punna hi kum khatah 11.5% a ni.

Vawiina loan semchhuah hi Shishu Loan a ni a, State Bank of India Serchhip Branch hnuaiah mi 13, Mizoram Rural Bank Serchhip Branch hnuaiah mi 12, Mizoram Rural Bank New Serchhip Branch hnuaiah mi 12, Mizoram Rural Bank Chhiahtlang Branch hnuaiah mi 9 leh Mizoram Cooperative Apex Bank Serchhip Branch hnuaiah mi 5, an vaiin mi 51 hnenah loan hi pek chhuah a ni a, Shishu Loan dil duh te chuan anmahni hnaih ber tu Bank ah kalin dilna form an lachhuak thei a, March, 2016 thleng dil theih a ni.

Kishor Loan leh Tarun Loan hi tun dinhmunah chuan pek chhuah a la ni rih lo a ni.

Vawiin Loan sem inkhawm hi Pu S.P. Sharma, Chief Manager, SBI Lead Bank. Champhai District in a kaihruai a, Serchhip a Bank hrang hrang enkawltu Branch Manager ten fuihna thu an sawi bakah beneficiary te nen hriatfiah loh leh zawhchian duh te in zawhna hun benglut tak an hmang bawk a ni.

Source: DIPR, Serchhip