SERCHHIP DIPRO THAR LEH CHANCHINBUMITE INKAWM


Serchhip, 1st June, 2016 : Vawiin chawhnu dar 1:30 pm hian Serchhip District Information and Public Relations Officer thar Pu K. Saitluanga, MIS chuan Serchhip MJA member te chu a office Chamber-ah lenga sawmin inkawm hona an nei.

Thusawiin Pu K. Saitluanga chuan, Serchhip District a chanchinbumite chu inpawh tlang taka hna thawh ho puiah a sawm a, mipuiten an hriat tur thil tangkai leh pawimawh tinreng hrilh hre theitu an nih avangin ram tan an pawimawh zia hre thar fo turin a chah bawk. DIPRO Office chu chanchinbumite tan a inhawng hle tih hrilhin an mamawh awm ang angte chu inthlahrung hauh lova lam thin tur leh Bawrhsap Office leh a chhehvela Office pawimawhte an dawr changa chawlh hahdam nana rawn hmang thin turin a sawm a ni. Advertisement chungchang sawiin Pu K. Saitluanga chuan, Advertisement hi chanchinbumite inhlawhna atana siam a ni lova, sawrkar leh a mipuite indawr tawnna niin a hmanruaah chanchinbute hman an ni thin a ni, tiin Advertisement awm ang angte rual khai taka sem thin a tum thu a sawi bawk.

Pu C. Lalhminghlua, President MJA Serchhip District chuan thu sawiin Serchhip District mi leh sa ngei DIPRO thar a lo awm chu lawmawm an tih thu sawiin sawrkar chungah pawh an lawm hle a ni a ti. MJA te hi inpawh tlang taka thawk ho thin leh DIPRO Office nena inthlunzawm tlat an nih avangin DIPRO Office pawh an ta neih hle a ni a ti a. District tana thahnemngai taka thawk ho zel turin DIPRO leh a staffte a sawm a, fuih an ngaihnaah fuih a, in puih a tulna ah pawh in pui tlang zel turin a sawm a ni.

Ramin hma a sawn nana MJA te hmachhawp sawiin District chhunga sawrkar department hrang hrangte hma lakna leh an hmunhma te tlawh kual thin an tum thu leh fak tlak chu fak a, sawisel ngai chu sawisel mai tur anih thu leh chu chuan rah tha a chhuah ngei an beisei thu a sawi a ni. He hunah hian MJA member dangte pawhin thusawina hun an hmang bawk.

MJA Serchhip District hi kum 2000 khan Serchhip District Journalist Association (SDJA) tia din niin kum 2007 khan Mizoram Journalist Association (MJA) ah inchhung lutin MJA Serchhip District tih an lo ni ta a. Tun dinhmunah Serchhip khawchhungah MJA enkawlin nitin chanchinbu 13 tih chhuah niin, Cable TV 2 a awm a. Thenzawlah chanchinbu 2 awm bawkin, MJA Serchhip District member te hi an vain mi 15 an awm mek a ni.

Source: DIPR, Serchhip