SILK PANGANG ENKAWL DAN TUR TRAINING BUATSAIH A NI


Dated Serchhip, the 1st February, 2017: Vawiin chawhma dar 10:00 hian State Agricultural Management & Extension Training Institute (SAMETI), Mizoram buatsaihin Agriculture Conference Hall, Serchhipah ‘Commercial Silkworm Rearing and Disease, Pest Management’ tih thupui hmanga ni hnih awh tur training an buatsaih chu District Bawrhsap Dr. Lalrozama, IAS, Chairman ATMA Governing Board Serchhip chuan a hawng.

Dr. Lalrozama chuan, mithiamten kan tualchhung ngeia min rawn kal chilha, zirtirna min rawn pe tur hi a lawmawm tak zet a, training hi phur thut thila buatsaih mai theih thil a ni lo tih hre chungin chhawr tangkai ngei turin kal khawmte chu a ngen a, midangte pawh la zirtir chhawng thei tura training turin a chah a ni. Agriculture Department leh a kaihhnawih Department dangte hmalakna hi nitina kan mamawh leh kan fairel bel nena inzawm tlat thil a ni a, a pawimawhna leh a tulna kan hriat a, kan hlut zual deuh deuh pawh a tul ani a ti bawk.

He hunah hian Pu R.K. Nithanga, Director, SAMETI pawhin thu sawiin SAMETI kalphung a sawifiah a. He Training hi an Campus pawn lama Training an buatsaih tum khatna a nih thu leh Agriculture leh a kaihhnawih Department dangte hi a hrangin hna thawk thin mah ila, loneitute tana thawk tlang vek kan ni a, loneituten hlawk zawka an hnathawh rah an seng hi kan duh ber vek chu a ni a ti.

He Trainingah hian Sericulture Department a thawktute leh Serchhip leh Chhiahtlanga Silk Pangang khawitu mi thahnem tak an tel a. Dr. Lalthlamuana, Scientist ‘C’ Central Silkboard, Pi C. Laldinpuii, Deputy Project Director/Faculty, SAMETI leh Pi S. Lalrintluangi, Sericulture Extension Officer Serchhip ten thupui then hrang hrangah zirtirna an pe a ni. Naktukah Chhingchhip a Sericulture Department hmalakna hmun an tlawh ang a, Silk Pangang enkawl dante a taka entir chungin an in zirtir leh ang.

Vawiina Training hawnna hi Pu V. Zothansanga, District Sericulture Officer chuan a kaihruai a ni.

Source: DIPR, Serchhip