MP thlang turin Serchhip Dist. a inpeih ta Serchhip 14th April
India ram rorelna sang ber Parliament a Mizoram aiawh tur Lok Sabha MP thlang turin Serchhip Dist. huamchhunga inbuatsaihna zawng zawng chu peihfel a ni ta. He thu hi vawiin zing dar 8:00am khan Serchhip Dist. Election Officer Pu H. Darzika chuan a Office Chamber ah Press Meet neiin tualchhung chanchinbu mite hnenah a hrilhfiah a, Polling Parties, venhimna, lirthei leh inbiakpawhna thlengin engkim hman mai theih a peihfel a ni tawh tih a tarlang.
Serchhip Dist. a Constituency 3 ah te hian Polling Station 67 a awm a, heng zingah khaw 2- Thinglian leh Hmunzawl chauh hi ke a kal ngai a ni a, a bak zawng chu Motor a thlen theih vek a ni. Serchhip Constituency ah hian Polling Station 17 a awm a, Tuikum ah Polling Station 25 leh Hrangturzo ah 25 a awm. Inthlan vuak vet a Duty tur hian Bus 6 leh LMV 79 zet hire an ni a, Polling Staff te hi an vaiin mi 229 tirhchhuah an ni dawn a, Polling Party kalchhuak hmasa ber Thinglian khua a kal tur te chu vawiin chawhma dar 11 khan Dist. Election Officer Pu H. Darzika’n a vailiam a, naktuk zing dar 6 atang hian Polling Party dang kal chhuak lehin naktuk tlai hi chuan Polling Party te zawng zawng hi an duty na hmun thleng vek tur a ngaih an ni. Tum danga tih dan ngai loh ang takin tun tum inthlanah hi chuan Polling Station a duty tur te hi Electoral Roll a an hming a chuan lohna Constituency ah Duty tir vek an ni dawn a, entirnan : Serchhip Constituency atanga Polling Officer emaw, Presiding Officer tur a ruat te chu Tuikum ah emaw Hrangturzo Constituency ah emaw an duty a ngai dawn tihna a ni.
Inbiakpawhna lam pawh tun tum inthlan ah hian changtlung taka kalpui ani dawn a, Polling Station tin ah Telephone dah ani ang a, heta duty te hi duh duh hunah biak pawh theih reng an ni ang a, New Delhli a Election Commission Office atang pawhin a tul dan azirin Random contact pawh a rawn neih zauh zauh mai thei niin DEO Pu H. Darzika chuan a sawi. Hei bakah hian D.C. Office ah Media Centre siam a ni bawk a, heta tang hian inthlan thu thar engkim zawh fiah theih reng ani dawn a, vote chhiar lai pawh T.V. ah Live a tihchhuah reng tum a ni bawk.
VENHIMNA LAM
Venhimna lam pawh uluk tak a ruahhman fel ani tawh a, District Election Officer tawiawmtu S.P. Pu John Zothansanga sawi danin March ni 9 atang daih tawh khan Election Cell din ani tawh a, Serchhip District hi zone 4 a thenin Serchhip, Thenzawl, N. Vanlaiphai leh Tlungvel zoneah te then ani a, heng khua a te hian Striking Force dah nghal vek ani bawk. Inthlanna a hman tur Electronic Voting Machine dahna Strong Room hi Police Platoon khatin chhun zan zawmin an veng reng tawh a, naktuk April 15 atang hian vote chhiar na hmun tur Counting Hall D.C’s Conference Hall ami pawh Police Platoon 2 in vote chhiar hma zawng an veng chhun zawm nghal tawh dawn ani. Tin, inthlan vuak vet avangin Serchhip District a Officer 8 te chu Sectoral Magistrate Power thla hnih chhung atan pek an ni bawk a, chung mite chu Pu Sangdingliana P.D, DRDA, Pu R. Lalnunmawia DLAO, Pi Teresy Vanlalhruaii SDO(C) N. Vanlaiphai, Pu H. Dolianbuaia SDO(C) Thenzawl, Pu R. lalbiakthanga, S.Dy.M, Pu Laltlawmlova ASO-II, Pu David Zoliana A.E. DRDA leh Pu Chuauhnuna BDO, E.Lungdar te an ni.
